माळीनगर (प्रतिनिधी): क्रांतीसूर्य महात्मा जोतिबा फुले आणि विश्वरत्न डॉ. बाबासाहेब आंबेडकर यांच्या जयंतीनिमित्त माळीनगर येथे 'फुले-आंबेडकर संयुक्त मध्यवर्ती जयंती उत्सव मंडळाच्या वतीने यंदा भरगच्च कार्यक्रमांचे आयोजन करण्यात आले आहे. १ एप्रिलपासून सुरू होणारा हा उत्सव १४ एप्रिलपर्यंत चालणार असून, यामध्ये सामाजिक प्रबोधन, आरोग्य शिबिरे आणि सांस्कृतिक स्पर्धांचा समावेश आहे.उत्सवाची सुरुवात बुधवार, १ एप्रिल रोजी 'संगीत खुर्ची' स्पर्धेने होणार आहे. त्यानंतर वक्तृत्व स्पर्धा, लिंबू-चमचा स्पर्धा आणि लहान मुलांसाठी डान्स स्पर्धांचे आयोजन करण्यात आले आहे. ५ एप्रिल रोजी रक्तदान शिबिर ,१३ एप्रिल रोजी नांदेड येथील नालंदा सांगवीकर व संच यांचा भीमगीतांचा बहारदार कार्यक्रम होणार असून, १३ एप्रिल रोजी स्नेहभोजनाचे आयोजन करण्यात आले आहे.
केवळ मनोरंजनच नव्हे तर सामाजिक बांधीलकी जपत मंडळाने विविध शिबिरांचे आयोजन केले आहे फिजिओथेरपी कॅम्प, रक्तदान शिबिर, डोळे तपासणी व सर्व रोग निदान शिबिर, बांधकाम कामगार नोंदणी, रेशनकार्ड कॅम्प,आधार कार्ड दुरुस्ती व नोंदणी कॅम्प, प्रा. समाधान काटे व डॉ. माळी यांचा अंधश्रद्धा निर्मूलन कार्यक्रम, तसेच इंजि. पवन दवंडे यांचा समाज प्रबोधनपर कार्यक्रम आयोजित केला आहे. ११ एप्रिल (महात्मा फुले जयंती): सकाळी ९ वाजता प्रमुख पाहुण्यांच्या हस्ते ध्वजारोहण होईल. सायंकाळी महिलांसाठी खास 'स्टार मिनिस्टर' खेळ पैठणीचा कार्यक्रम होणार आहे. १४ एप्रिल (डॉ. बाबासाहेब आंबेडकर जयंती): सकाळी ९ वाजता ध्वजारोहण पार पडेल. सायंकाळी ६ वाजता महात्मा फुले आणि डॉ. बाबासाहेब आंबेडकर यांच्या प्रतिमांची भव्य मिरवणूक काढण्यात येणार आहे.
हे सर्व कार्यक्रम रमामाता कॉलनी, जयभीम पटांगण, माळीनगर (ता. माळशिरस) येथे संपन्न होतील. या भव्य आयोजनासाठी फुले-आंबेडकर संयुक्त मध्यवर्ती जयंती उत्सव मंडळाचे पदाधिकारी व कार्यकर्ते परिश्रम घेत आहेत. या सर्व कार्यक्रमांना माळीनगर व परिसरातील नागरिकांनी मोठ्या संख्येने उपस्थित राहावे,असे आवाहन आयोजकांच्या वतीने करण्यात आले आहे.
